Sköpun akademóna. Skýrsla um verkefni og viðburði 2006-2021

Í tilefni af 15 ára afmæli AkureyrarAkademíunnar kom út í þessari viku merkileg skýrsla sem Margrét Guðmundsdóttir sagnfræðingur tók saman um verkefni sem einstaklingar unnu að á þeim tíma er þeir voru með vinnuaðstöðu hjá AkureyrarAkademíunni frá stofnun Félags sjálfstætt starfandi fræðimanna á Norðurlandi árið 2006 og til þessa dags. Um er að ræða fjölbreytt safn verka, lokaritgerðir, rannsóknarskýrslur, tímaritsgreinar, kennsluefni og ýmis önnur ritverk. Einnig er í skýrslunni yfirlit yfir viðburði á vegum Félags sjálfstætt starfandi fræðimanna og AkureyrarAkademíunnar á tímanum 2006 til 2021.

Skýrslan sýnir að á liðnum 15 árum hafa tæplega 100 einstaklingar verið með vinnuaðstöðu hjá AkAk, flestir þeirra í námi við innlenda og erlenda háskóla og hinn hlutinn fjölbreyttur hópur vísinda-, fræði- og listamanna sem og frumkvöðla, og eru það tæplega 50 greinar eða fræðisvið sem akademónar hafa lagt stund á. Á þessum tíma hefur AkAk staðið fyrir ríflega 150 viðburðum þar sem lögð hefur verið áhersla á að tengja saman ólíka hópa og að virkja almenning til þátttöku.

Starfsemi AkAk hefur gefið háskólanemum og þeim sem vinna að fræði- og ritstörfum hér í bæ og víðar tækifæri til menntunar og sköpunar á heimaslóðum og þverfaglegt samfélag einstaklinga með fjölbreyttan bakgrunn hefur skapað frjótt samtal og umhverfi sem hefur auðgað mannlíf og menningarstarf hér á svæðinu.
​
Hægt er að nálgast skýrsluna með því að senda tölvupóst á netfangið adalheidur.steingrimsdottir@akak.is
​