Vísindasamfélagið á Akureyri. Hvað gengur vel og hvað getum við gert saman til að efla Akureyri sem eftirsóknarverðan stað til að vinna að rannsóknum og fræðastarfi?

Opinn fundur AkureyrarAkademíunnar og Háskólans á Akureyri, fimmtudag 17. maí, kl. 12:00-13:00, í stofu M102 í Háskólanum á Akureyri.

Á fundinum verður sjónum beint að framþróun vísindasamfélagsins á Akureyri og hvernig megi efla það ennfrekar.

Inngangserindi halda annars vegar Margrét Guðmundsdóttir sagnfræðingur um 15 ára rannsóknarsögu AkureyrarAkademíunnar og hins vegar Eyjólfur Guðmundsson rektor Háskólans á Akureyri um umhverfi og aðstöðu fyrir rannsóknir og fræðastarf á Akureyri.

Eftir erindin fara fram umræður um það sem við erum nú þegar með sem tryggja þarf áfram og hvernig megi efla Akureyri sem eftirsóknarverðan kost fyrir vísinda- og fræðafólk til að starfa að sínum rannsóknum.

Hvað vantar upp á? Hvað getum við gert saman til að búa í haginn fyrir öflugt vísindalíf á Akureyri?

Allir velkomnir! 

Ársfundur AkureyrarAkademíunnar (AkAk) 2022 fer fram þriðjudaginn 24. maí nk. og hefst kl. 19:30.

Fundurinn er í húsnæði AkAk, Sunnuhlíð 12, Akureyri.

Á dagskrá eru aðalfundarstörf samkvæmt 12. gr. skipulagsskrár AkAk:
1. Skýrsla stjórnar.
2. Endurskoðun reikninga.
3. Upptalning fulltrúa.
4. Kjör formanns og fulltrúaráðs.
5. Fjárhagsáætlun og árgjald.
6. Breytingar á skipulagsskrá.
7. Önnur mál.

Árgjald vegna ársfundar 2022 er kr. 1.500. Vakin er athygli á að samkvæmt 5. gr. skipulagsskrár AkAk er atkvæðisréttur á ársfundi bundinn við þá sem greiða árgjald fyrir ársfund en fundurinn er engu að síður öllum opinn. 

ReykjavíkurAkademían óskar eftir að ráða tvo háskólanema í sumar, annan í upplýsingafræði og hinn í sagnfræði, til að vinna við rannsóknaverkefnið: Gagnagrunnur um starf og afurðir sjálfstætt starfandi fræðafólks. Verkefnið er styrkt af Nýsköpunarsjóði námsmanna og unnið í samvinnu við AkureyrarAkademíuna.Um er að ræða fullt starf í þrjá mánuði. Æskilegt er að viðkomandi geti hafið störf eigi síðar en 1. júní.
STARFSLÝSING
Starfið felst í að taka saman upplýsingar um fjölda, menntun og afurðir fræðafólks hjá Reykjavíkur- og AkureyrarAkademíunni á tímabilinu 1997 – 2021 og skrá í gagnagrunn. Einnig að skoða fjármögnun opinberra sjóða og breytingar á umhverfi sjálfstætt starfandi fræðafólks. Verkefninu lýkur með fyrirlestri á málþinginu Sjálfstæðir rannsakendur – umhverfi og áskoranir sem haldið verður 14. október 2022.

HÆFNISKRÖFUR
Leitað er að nema í upplýsingafræði með áhuga á gerð og virkni upplýsingagrunna og nema í sagnfræði með áhuga á sögu íslenskra fræða, rannsókna og þekkingarsköpunar á sviði hug- og félagsvísinda. Æskilegt er að umsækjendur búi yfir frumkvæði og sveigjanleika og eigi auðvelt með að vinna í teymi, auk nákvæmni í vinnubrögðum og samviskusemi.

Nánari upplýsingar um verkefnið: www.akademia.is/gagnagrunnur-styrkur/
Nánari upplýsingar um starfið: annath@akademia.is / 844 1035
Umsóknir sendist í tölvupósti til: ra@akademia.is ásamt tveimur meðmælabréfum. Umsóknafrestur er til og með 8. maí.
​

Þriðjudaginn 26. apríl nk. mun dr. Páll Jakob Líndal umhverfissálfræðingur halda fyrirlestur á vegum AkureyrarAkademíunnar um skipulagsmál sem hefur yfirskriftina: Hvers konar þéttbýli viljum við? Í fyrirlestrinum ætlar dr. Páll Jakob að fjalla um upplifun fólks í þéttbýlisumhverfi, hvað þurfi að leggja áherslu á svo skapa megi mannvænt og heilsusamlegt þéttbýli og hvernig megi brúa bilið milli ólíkra hagsmunahópa þegar kemur að hönnun og uppbyggingu þess. Á 21. öldinni er krafan sú að við hönnun, mótun og skipulagningu þéttbýlis sé heilsa og velferð fólks tekin alvarlega. Að umhverfið sé því  hliðhollt, það bæti, efli og styrki.

Fyrirlesturinn fer fram í sal Félags eldri borgara á Akureyri, Bugðusíðu 1, og hefst kl. 16:00. Fyrirlesturinn er öllum opinn og aðgangur er ókeypis. 

Dr. Páll Jakob Líndal er með doktorspróf í umhverfissálfræði frá Háskólanum í Sydney. Hann er sérfræðingur í mati á sálfræðilegum áhrifum umhverfis á heilsu og vellíðan, hvort um er að ræða náttúru eða byggt umhverfi. 

Dr. Páll Jakob hefur áralanga reynslu af skipulagsmálum og verkefnum er snúa að verndun byggingararfsins, s.s. uppmælingum og gerð húsakannana, auk þess að vinna að sálfræðilegum rannsóknum. Hann hefur um árabil verið ötull talsmaður þess að sálfræðileg sjónarmið fái sitt rými í hönnunar- og skipulagsferlum og lögð sé ríkari áhersla á samspil fólks og umhverfis.

Dr. Páll Jakob á og rekur TGJ – hönnun-ráðgjöf-rannsóknir og einnig ráðgjafarfyrirtækið ENVALYS.  Þá kennir dr. Páll Jakob umhverfissálfræði við Háskóla Íslands og Landbúnaðarháskólann á Hvanneyri, auk þess að vera fyrirlesari og markþjálfi.

Fyrirlesturinn er sá fyrsti í fyrirlestraröð á þessu ári sem AkAk mun bjóða bæjarbúum upp á í tilefni af 160 ára afmæli Akureyrarbæjar á árinu. Markmiðið með fyrirlestrunum er að auka framboð á fjölbreyttu og aðgengilegu efni um sögu og menningarlíf á Akureyri og að virkja almenning til þátttöku. Menningarsjóður Akureyrar styrkir fyrirlestrana.