Tvær fræðikonur hjá AkureyrarAkademíunni verða með erindi í Þjóðarspeglinum, árlegri ráðstefnu í félagsvísindum við HÍ, sem fer fram föstudaginn 30. október nk. Þetta eru þær dr. Arndís Bergsdóttir og dr. Valgerður S. Bjarnadóttir.

Arndís verður með erindi í málstofunni Disability before Disability: Thinking outside preconceived ways of doing research  og heitir erindi hennar Rými fyrir kvikar sögur: Ósýnilegur arfur fatlaðs fólks á söfnum. Arndís tekur einnig þátt í  pallborði í málstofunni Stéttavitund, elitumyndun og menningarlegt forræði en þar er viðfangsefnið valdagreining á íslensku samfélagi fyrr og nú.

Valgerður er meðhöfundur tveggja erinda. Annað þeirra verður haldið í málstofu um Háskóla og lýðræði og hefur það heitið Háskólar og samtal við samfélagið – Vinnumatskerfið sem stýrandi afl. Hitt erindið verður haldið í málstofu um Móðurhlutverk og mæðrun  og fjallar það um niðurstöður rannsóknar á áhrifum Covid-19 faraldursins á heimilislíf, heimilisstörf og umönnun barna.
​
Ráðstefnan í ár er rafræn og málstofur haldnar í streymi. Á vefsíðu ráðstefnunnar er að finna yfirlit yfir allar málstofur í stafrófsröð og þegar smellt er á nafn málstofu er hægt að nálgast tengil á streymi og ágrip erinda https://thjodarspegillinn.hi.is/#Dagskra2020
​

Fyrir skömmu blésu fulltrúar AkureyrarAkademíunnar til umræðufundar um stefnu og starf AkAk á næstu árum. Hólmar Svansson framkvæmdastjóri HA var fenginn til að stýra vinnunni og notaði þar áhugaverðar og skemmtilegar aðferðir sem fólust meðal annars í að fólk mótaði eigin útfærslur með legókubbum sem stóðu fyrir sýn á áherslur og verkefni sem framtíðarstefna fyrir AkAk þurfi að taka til. Gert er ráð fyrir að næstu mánuðir verði notaðir til að vinna að þessu verki. Hér eru tvær myndir af legóbyggingum dagsins.