​Við í AkureyrarAkademíunni fengum í vikunni góða gesti frá skapandi sumarstörfum í Ungmennahúsinu Rósenborg. Tilefni heimsóknarinnar er samstarf AkureyrarAkademíunnar og Skapandi sumarstarfa vegna viðburðar okkar á Akureyrarvöku „samtal um hamingjuna“. Í sumar hafa ungmennin unnið að því að fanga hamingjuna hvert með sínum hætti. Það var skemmtilegt fyrir Akademóna að fá að heyra frá verkefnunum og bíðum við spennt eftir að fá að sjá afraksturinn á sýningunni. Við hvetjum alla til að mæta á sýninguna sem verður opnuð laugardaginn 27. ágúst kl 13:00 í Hlöðunni Litla-Garði. 

AkureyrarAkademían bendir á helgarnámskeið í skapandi skrifum í Mývatnssveit. 
Námskeiðið er ætlað þeim sem vilja auka ritfærni sína og skrifa skáldskap, jafnt byrjendum sem lengra komnum.  
Kennt er í Sel Hótel – Mývatni fös. 26. ágúst 18:00-22:00, 27. ágúst 10:00-14:00 og 28. ágúst 10:00-14:00.
Verð: 30.000 kr. 
Leiðbeinandi: Björg Árnadóttir, rithöfundur og fullorðinsfræðari
 
Skráning og frekari upplýsingar: http://www.stilvopnid.is

AkureyrarAkademían býður gestum Akureyrarvöku á viðburðinn „Samtal um hamingjuna“ í Hlöðunni Litla-Garði laugardaginn 27. ágúst kl 14:00. Þar munu Edda Björgvinsdóttir og Gunnar Hersveinn munu meðal annars ræða samband húmors og hamingju og hvers vegna ástæða er til að efla húmor og gleði í lífinu.

Edda Björgvinsdóttir er leikkona og MA í mennta- og menningarstjórnun. Meistararitgerð Eddu fjallar um „Húmor í stjórnun“ og nýverið lauk hún  diplómanámi í jákvæðri sálfræði frá HÍ. Edda hefur sl. 20 ár haldið ótalmörg námskeið og fyrirlestra hjá fyrirtækjum, félagasamtökum, hópum og opinberum stofnunum. Vinsælustu fyrirlestrar Eddu á vinnustöðum fjalla um húmor sem stjórntæki og gagnsemi hans í mannlegum samskiptum og til að auka starfsánægju.

Gunnar Hersveinn er rithöfundur og heimspekingur. Hann hefur tekið virkan þátt í samfélagsumræðunni til margra ára, haldið fyrirlestra og námskeið og skrifað bækur um gildi lífs og þjóðar. Þær heita Gæfuspor - gildin í lífinu, Orðspor - gildin í samfélaginu, Þjóðgildin og Hugskot - skamm-, fram- og víðsýni (2016) sem hann skrifaði með Friðbjörgu Ingimarsdóttur. 

Nemendur Kvikmyndaskóla Íslands munu taka viðburðinn upp og verður hann gerður aðgengilegur á Youtube.

AkureyrarAkademían, í samstarfi við Skapandi sumarstörf í Rósenborg mun opna sýningu nemenda í skapandi sumarstörfum en þeir hafa í sumar unnið að því að fanga hamingjuna eins og hún birtist þeim, með sköpunargleðina að leiðarljósi. Sýningin opnar kl 13:00 laugardaginn 27. ágúst í Hlöðunni, Litla-Garði.
​
Viðburðurinn er öllum opinn meðan húsrúm leyfir og aðgangur er ókeypis. 

Miðvikudaginn 3. ágúst 2016 stóð AkureyrarAkademían fyrir námskeiðinu Rannsóknasjóður Rannís: Gerðu betri umsókn! Kristján Kristjánsson, framkvæmdastjóri rannsókna og upplýsinga og forstöðumaður rannsóknarþjónustu við Háskólann í Reykjavík var kennari á námskeiðinu. Námskeiðið var vel sótt og vonandi mun það nýtast þeim sem það sóttu í að gera betri umsóknir.