Akureyrarbær og AkureyrarAkademían hafa gert samstarfssamning sín á milli til næstu þriggja ára. Markmið samningsins er að styðja við frumkvöðlastarf, og um leið starfsemi Akademíunnar, með því að bjóða einstaklingum sem vinna að nýsköpunar- og frumkvöðlaverkefnum upp á vinnuaðstöðu í húsnæði hennar án endurgjalds.
 
Starfsaðstöðunni fylgja skrifstofuhúsgögn, nettenging, aðgangur að prentara og sameiginlegri aðstöðu eins og fundaherbergi og eldhúsaðstöðu.
 
Gert er ráð fyrir að starfsaðstaðan verði auglýst laus til umsóknar til sex mánaða í senn fyrir einstaklinga sem vinna að verkefnum  á sviði nýsköpunar eða frumkvöðlastarfs og að í haust verði auglýst í fyrsta skipti eftir umsóknum.
 
Samningsaðilar hafa jafnframt sett verklagsreglur um auglýsingar og hvernig verður staðið að vali á þeim einstaklingum sem fá inni hjá Akademíunni hverju sinni . 

Myndin var tekin í tilefni af undirrituninni: Aðalheiður Steingrímsdóttir framkvæmdastjóri AkAk, Þórgnýr Dýrfjörð forstöðumaður Akureyrarstofu og Kristinn Reimarsson sviðsstjóri Samfélagssviðs Akureyrarbæjar 

Á ársfundi AkAk 2021 sem var haldinn fimmtudaginn 20. maí sl. fóru m.a. fram kosningar í stjórn og fulltrúaráð á komandi starfsári.

Í stjórn eru Steinunn A. Ólafsdóttir formaður, Þórhallur S. Bjarnason gjaldkeri og Sigurgeir Guðjónsson gjaldkeri.

Í fulltrúaráði eru Bergljót Þrastardóttir, Margrét Guðmundsdóttir, Dr. Martina Huhtamaki og Dr. Valgerður S. Bjarnadóttir.
 
AkAk þakkar öllum sem komið hafa að starfseminni á liðnu starfsári fyrir þeirra framlag og ánægjulegt samstarf.