​Valgerður S. Bjarnadóttir akademóni og nýdoktor á Menntavísindasviði HÍ er höfundur tveggja kafla í nýrri bók um norrænu skólakerfin („What Works in Nordic School Policies?“) sem hún skrifaði með Jóni Torfa Jónassyni og Guðrúnu Ragnarsdóttur. Fyrri kaflinn heitir „The Intricacies of Educational Development in Iceland: Stability or Disruption?“ og sá seinni „Evidence and Accountability in Icelandic Education – An Historical Perspective?“.
​
Bókin er framlag til alþjóðlegra rannsókna sem taka til samanburðar á menntastefnum og áhrifa þverþjóðlegra stofnana á skólastefnu þjóða og umbótastarf. Í bókinni er skoðuð merking Norræna módelsins eða Norrænu víddarinnar fyrir skóla- og menntastefnu og fjallað er ítarlega um skólastefnu norrænu landanna, Danmerkur, Finnlands, Íslands, Noregs og Svíþjóðar og hvernig þau takast á við þverþjóðlegt samstarf í skólamálum, svo sem skólaumbætur, kröfur um ábyrgð, gagnasöfnun og hvað virkar og tölvuvæðing. 

​Martina Huhtamäki akademóni og lektor í norrænum málum við Háskólann í Helsinki birti nýlega grein í fræðitímaritinu „Tal och Språk/Speech and Language“. Greinin heitir „Rutin och beröm. Prosodiska drag hos bra som uppföljning under personlig träning i Finland och Sverige“. 
 
Greinin fjallar um hljómfallið í orðinu „bra" (fínt) í upptökum frá einkaþjálfun á sænsku. Gögn úr finnsk-sænsku og sænsk-sænsku eru borin saman hvað varðar hljómfall, tíðni og notkun orðins. Markmiðið er að rannsaka hvort það sé menningarmunur milli Finnlands og Svíþjóðar varðandi orð sem fela í sér mat, eins og „bra". Rannsóknin fellur undir samskiptamálvísindi (interactional linguistics) og málnotkunarfræði í mállýskum (variational pragmatics) og sameinar eigindlegar og megindlegar aðferðir. 

Þann 8. mars sl. fór fram úthlutun úr Menningar- og viðurkenningasjóði KEA. AkureyrarAkademían fékk styrk til að halda fyrirlestra á öldrunarheimilum Akureyrarbæjar á þessu ári.